नेपाल पत्रकार महासंघले अनलाइन सञ्चारमाध्यमको दर्ता र नवीकरणको काम तत्काल खुलाउन सरकारलाई ७२ घण्टे अल्टिमेटम दिएको छ ।
महासंघकी अध्यक्ष निर्मला शर्मा नेतृत्वको प्रतिनिधि मण्डलले बुधबार सञ्चार तथा सूचना प्रविधिमन्त्री पृथ्वीसुब्बा गुरुङसमक्ष ज्ञापनपत्र बुझाउँदै अल्टिमेटम दिएका हुन् ।
महासंघका महासचिव रामप्रसाद दाहालद्वारा हस्ताक्षरित ज्ञापनपत्रमा, अवरुद्ध दर्ता र नवीकरण कार्य सुरु नभए महासंघ आन्दोलनमा उत्रिने चेतावनी दिइएको छ ।
ज्ञापनपत्र बुझ्दै मन्त्री गुरुङले अनलाइन सञ्चारमाध्यमलाई परेका असहजता हटाउन अस्थायी व्यवस्था गरिने र नयाँ नियमावली पनि तत्काल ल्याइने आश्वासन दिए । मन्त्रालयकी सचिव राधिका अर्यालले पनि दर्ता र नवीकरण प्रक्रिया सहज बनाउन पहल गरिने जानकारी दिइन् ।
छापाखाना तथा प्रकाशन सम्बन्धी ऐन, २०४८ मा संशोधन गरी अनलाइन सञ्चारमाध्यमको दर्ता–नवीकरण स्थानीय प्रशासनमार्फत गर्ने व्यवस्था भएपछि देशभर अनलाइन सञ्चारमाध्यमको दर्ता, नवीकरण र सञ्चालन अवरुद्ध भएको छ ।
ज्ञापनपत्र बुझाउन महासंघका उपाध्यक्ष उमिद बागचन्द, सचिव सोनी शर्मा, प्रकाश धौलाकोटीलगायत केन्द्रीय सदस्यहरू उपस्थित थिए ।