सुदूरपश्चिम रोयल्सले अमेरिकन अलराउन्डर हर्मीत सिंहलाई नेपाल प्रिमियर लिग (एनपीएल) दोस्रो संस्करणको निम्ति निरन्तरता दिएको छ । आइतबार सुदूरपश्चिमले हर्मीतलाई दोस्रो संस्करणमा निरन्तरता दिँदै तेस्रो विदेशी खेलाडीको रूपमा अनुबन्ध गरेको जनाएको हो ।
सिंह अघिल्लो संस्करणको एनपीएलमा सबैभन्दा कम इकोनोमीमा बलिङ गर्ने खेलाडी हुन् । गत सिजन उनले पाँच खेलमा आठ विकेट लिएका थिए । हर्मीतले सुदूरपश्चिममा अनुबन्धित भएपछि खुसी व्यक्त गरेका छन् ।
“म नेपाल प्रिमियर लिगमा फेरि एकपटक फर्किंदै छु । गत सिजनको अधुरो कामलाई यसपटक पूरा गर्नु छ । समर्थकहरूसँग छिट्टै भेट हुनेछ,” सिंहले भने ।
सुदूरपश्चिम रोयल्सका प्रमुख कार्यकारी अधिकृत (सीईओ) प्रकाश खड्काले हर्मीतको आगमनले टिम झनै बलियो बन्ने विश्वास व्यक्त गरे । उनले भने, “हर्मीतको आगमनले टिम झनै बलियो बनेको छ । उनीबाट गत सिजन जस्तै उत्कृष्ट प्रदर्शनको अपेक्षा गरेका छौँ ।”
३२ वर्षीय हर्मीत बाँयाहाते बलर हुन् र बाँयाहाते ब्याटिङ पनि गर्छन् । उनले टी–ट्वान्टी अन्तर्राष्ट्रियमा २५ खेलमा २४ विकेट लिएका छन् भने ब्याटिङमा २३५ रन बनाएका छन् ।
अमेरिकाका लागि उनले २१ एकदिवसीय खेलमा ३१ विकेट लिएका छन् भने ३२५ रन बनाएका छन् ।
स्मरण रहोस्, हर्मीत सन् २०१२ को यू–१९ विश्वकप विजेता भारतीय टोलीका सदस्य थिए । उनले इन्डियन प्रिमियर लिग (आईपीएल)मा राजस्थान रोयल्सका लागि समेत खेलेका छन् ।
सुदूरपश्चिम रोयल्सको टोली ः दिपेन्द्रसिंह ऐरी, आरिफ शेख, विनोद भण्डारी, अविनाश बोहरा, दिपक बोहरा, मिलन बोहरा, हेमन्त धामी, इशान पाण्डे, टेक रावत, नरेन साउद, दिपेन्द्र थापा, स्कट कुग्गेलिजन, क्रिस लिन र हर्मीत सिंह