नेपाल प्रिमियर लिग (एनपीएल)मा सुदूरपश्चिम रोयल्स लगातार दोस्रो जित निकाल्दै तालिकाको शीर्षस्थानमा उक्लिएको छ। पोखरा एभेन्जर्सलाई १८ रनले पराजित गर्दै साविक उपविजेता सुदूरपश्चिमले चार अङ्कसहित शीर्षस्थानमा उक्लिएको हो ।
पहिलो खेलमा काठमाडौँ गोर्खाजमाथि २९ रनको जित दर्ता गरेका सुदूरपश्चिमले आज १९४ रनको लक्ष्य दिएका थिए। जवाफमा पोखरा २० ओभरमा आठ विकेट गुमाउँदै १७५ रनमै रोकियो। पोखराका कप्तान कुशल भुर्तेलले ३२ बलमा ५३ रन जोडेर संघर्ष गरे पनि जित दिलाउन सकेनन्। जिम्मी निशमले ४७ र ड्यान डाउथवेटले ३७ रन जोडे।
सुदूरपश्चिमका हर्मित सिंहले दुई विकेट लिए भने स्कट कुइगेलेइन, कप्तान दीपेन्द्रसिंह ऐरी, अभिनास बोहरा, हेमन्त धामी र नरेन साउदले एक–एक विकेट दिलाए।
पहिला ब्याटिङ गरेको सुदूरपश्चिमका जोश ब्राउनले ३५ बलमा ६८ रन प्रहार गर्दै प्रभावशाली प्रदर्शन गरे। विनोद भण्डारीले ४३, क्रिस लिनले ३१ तथा कप्तान ऐरीले १५ रन बनाए। ब्राउन र भण्डारीले पहिलो विकेटका लागि १०८ रनको शतकीय साझेदारी गरेका थिए।
पोखराका लागि जिम्मी निशमले तीन विकेट लिए भने ड्यानियल डाउथवेट र आकाश चन्दले दुई–दुई विकेट हात पारे। नेपाल क्रिकेट सङ्घको आयोजनामा मंसिर १ गतेदेखि शुरु भएको यो प्रतियोगितामा आठ टोली सहभागी छन्।
