राष्ट्रिय परीक्षा बोर्डले कक्षा १२ को नतिजा सार्वजनिक गरेको छ । सोमबार साँझ बोर्डले नतिजा सार्वजनिक गरेको हो ।
नतिजा अनुसार ६१.१७ प्रतिशत विद्यार्थी उत्तीर्ण भएका छन् भने ३८.८३ विद्यार्थी ननग्रेड भएका छन्।
कक्षा १२ को परीक्षा गत वैशाख २१ गते देखि सञ्चालन गरिएको थियो ।
परीक्षामा पाँच हजार २०२ विद्यालयका नियमिततर्फ एक लाख ९८ हजार ८७५ छात्र र एक लाख ९७ हजार १३ छात्रा गरी तीन लाख ९५ हजार ९०८ परीक्षार्थी सहभागी भएका थिए ।
त्यस्तै आंशिकतर्फ एक लाख १५ हजार ६१७ जना गरी कुल पाँच लाख ११ हजार ५२५ परीक्षार्थी सहभागी भएका थिए ।
कसरी हेर्ने परीक्षा नतिजा
नतिजा प्रकाशित भएसँगै विभिन्न माध्यमबाट परीक्षाफल थाहा पाउन सकिनेछ । यसअन्तर्गत नेपाल टेलिकमले आईभीआर, यूएसएसडी, वेबसाइट र मेसेजबाट नतिजा हेर्न मिल्ने व्यवस्था मिलाएको छ ।
टेलिकमको सिम तथा ल्यान्डलाइन नम्बरबाट १६०१ मा फोन गरेर त्यहाँ दिइएको निर्देशन अनुसार नतिजा हेर्न सकिन्छ । यस्तै *१६००# डायल गरेर पनि नतिजा थाहा पाउन सकिन्छ ।
यस्तै वेबसाइटबाट ग्रेडसिट सहित कक्षा १२ को नतिजा हेर्न सकिने कम्पनीले जनाएको छ । neb.ntc.net.np मा गएर वा यहाँ क्लिक गरेर सिम्बोल नम्बर र जन्ममिति राखेर ग्रेडसिट सहित नतिजा हेर्न सकिन्छ ।
त्यस्तै मोबाइलको मेसेज बक्समा गई NEB<space> सिम्बोल नम्बर टाइप गरी १६०० मा पठाएर पनि नतिजा हेर्न सकिन्छ । (उदाहरणका लागि NEB 12345678 टाइप गरेर १६०० मा पठाउन सकिन्छ ।
त्यसै गरी एसएमएस र टेलिफोनमार्फत् पनि नतिजा थाहा पाउन सकिने व्यवस्था परीक्षा बोर्डले गरेको छ।