प्रधानमन्त्री सुशीला कार्की मंगलबार तिलगंगा आँखा प्रतिष्ठान पुगेर वरिष्ठ नेत्रविज्ञानी डा. सन्दुक रुइतसँग भेट गरेकी छन्। भेटमा प्रधानमन्त्री कार्कीले विशेष परिस्थिति र चुनौतीपूर्ण घडीमा आफूले सरकारको नेतृत्व गर्नुपरेको भन्दै सरकारलाई साथ दिन आग्रह गरेकी थिइन्।
जवाफमा डा रुइतले सरकारलाई बाहिरबाट सहयोग गर्ने तर प्रत्यक्ष रुपमा मन्त्री बन्न नसक्ने स्पष्ट पारेका हुन्।
छलफलपछि डा रुइतले आफूले अस्पतालको काम र बिरामीलाई छाड्न नसक्ने बताए ।
सञ्चारकर्मीले “क्याबिनेटमा आउने हो ?” भनेर सोधेको प्रश्नमा उनले भने, “यहाँ छोडेर आउने ? यत्रो काम छ, बिरामीलाई छाडेर आउँदैन।”
जेनजी आन्दोलनपछि बनेको अन्तरिम सरकारको मन्त्री बन्ने चर्चा चलेपछि रुइतले भने आफू चिकित्सकीय पेसामार्फत नागरिकको सेवामा तल्लीन हुने बताउँदै आएका छन् ।