एजेन्सी – न्युजिल्यान्डका पूर्व कप्तान तथा स्टार क्रिकेटर केन विलियमसनले टी–२० अन्तर्राष्ट्रिय क्रिकेटबाट सन्न्यास लिएका छन्। सन्न्यास घोषणा गर्दै उनले अब टेस्ट क्रिकेटमा ध्यान केन्द्रित गर्ने बताएका छन्।
विलियमसनले आगामी डिसेम्बरमा वेस्ट इन्डिजविरुद्धको ३ खेलको टेस्ट सिरिजमा सहभागी हुने पुष्टि गरेका छन्।
३५ वर्षीय विलियमसनले सन् २०११ मा जिम्बाबेविरुद्ध टी–२० आईमा डेब्यू गरेका थिए। उनले ९३ खेल खेलेका छन्, जसमा ७५ खेलमा कप्तानी गरेका थिए। उनको नेतृत्वमा न्युजिल्यान्ड २०१६ र २०२२ को विश्वकपमा सेमिफाइनल तथा २०२१ मा फाइनल पुगेको थियो।
टी–२० अन्तर्राष्ट्रियमा उनले १८ अर्धशतकसहित २,५७५ रन बनाएका छन्। २०२१ विश्वकप फाइनलमा अष्ट्रेलियाविरुद्ध उनले ८५ रनको शानदार इनिङ खेले पनि न्युजिल्यान्ड उपाधिबिहीन बनेको थियो।
सन्न्यास घोषणा गर्दै विलियमसनले भने —
“टी–२० क्रिकेट मेरो जीवनको महत्वपूर्ण हिस्सा रह्यो। यस फर्म्याटले दिएको अनुभव र सम्झनाका लागि म आभारी छु। यो निर्णय मेरो र टोली दुवैका लागि उपयुक्त समय हो। नयाँ खेलाडीलाई अवसर दिन आवश्यक छ।”
न्युजिल्यान्ड क्रिकेटका प्रमुख कार्यकारी स्कट विन्गिङले भने —
“केनको कप्तानी र प्रदर्शन हरेक परिस्थितिमा उत्कृष्ट रह्यो। उनको निरन्तरता र नेतृत्वले टोलीलाई नयाँ उचाइमा पुर्याएको छ।”
उनका अनुसार, “वेस्ट इन्डिजविरुद्धको टेस्ट सिरिजमा केनलाई फेरि खेलिरहेका देख्नु समर्थकका लागि अवसर हुनेछ।”
विलियमसन अहिले केन्द्रीय सम्झौतामा छैनन्।
ओडिआई क्रिकेटबारे भने उनले छिट्टै निर्णय गर्ने बताएका छन्।