बैतडी कार्तिक १२। बैतडीमा जिप दुर्घटना हुँदा एक जनाको मृत्यु भएको छ भने चारजना घाइते भएका छन्। जिल्लाको शिवनाथ गाउँपालिका-५ को सुल्लेखानबाट मेलौली–२ सलेनातर्फ आइरहेको से १ ज ७३२ नम्बरको जिप मेलौली नगरपालिका–७ स्वाखानीमा बुधबार राति ११ बजे दुर्घटनामा परेको हो।
दुर्घटनामा परी मेलौली नगरपालिका–२ की २३ वर्षीय तुलसि पाण्डेयको उपचारका क्रममा मृत्यु भएको जिल्ला प्रहरी कार्यालय बैतडीका प्रवक्ता एवं प्रहरी निरीक्षक बल्देव बडूले जानकारी दिए। गम्भीर घाइते पाण्डेयको केशरपुर प्राथमिक स्वास्थ्य केन्द्रमा उपचारका क्रममा मृत्यु भएको हो।
दुर्घटनामापरि अन्य चार जना घाइते भएका छन्। मेलौली नगरपालिका–२ का ३४ वर्षीय हरि पाण्डेय, सोही ठाउँका २८ वर्षीय ओम पाण्डेय, ६५ वर्षीय डम्बरदत्त पाण्डेय र दशरथचन्द नगरपालिका–७ का ३२ वर्षीय जिप चालक जनक बडू घाइते भएका प्रहरी निरीक्षक बडूले जानकारी दिए।
जिप अनियन्त्रित भएर सडकबाट १० मिटर तल खसेको र दुर्घटनाको कारण बारे थप अनुसन्धान भइरहेको प्रहरी निरीक्षक बडूले बताए।
घाइतेहरूलाई थप उपचारका लागि डडेलधुरा अस्पताल पठाइएको जिल्ला प्रहरी कार्यालय बैतडीले जनाएको छ।