प्यालेस्टाइनी विद्रोही समूह हमासले नेपाली विद्यार्थी विपिन जोशीको मृत्यु भइसकेको पुष्टि गरेको छ । जोशीको शव आजै बुझाइने हमासले जानकारी दिएको छ ।
गाजामा इजरायली सेनाको आक्रमणमा परी विपिनको मृत्यु भएको पनि हमासले दाबी गरेको छ । विपिनसँगै आज चार जना बन्धकको शव इजरायललाई बुझाइने जनाइएको छ । फिर्ता गरिने चार बन्धकका शवमा जोशीसहित इजरायली नागरिक गाई इलोज, योसी शाराबी र ड्यानियल पेरेट्ज छन् ।
आजै हमासले २० जना जीवित बन्धक इजरायललाई हस्तान्तरण गरेको थियो । ७ अक्टुबर सन् २०२३ मा हमासले इजरायलमाथि आक्रमण गर्ने क्रममा विपिन अपहरणमा परेका थिए ।
त्यसयता उनी घाइते अवस्थामा एकपटक अस्पतालमा देखिएको दाबी गरिएको थियो । केही दिनअघि मात्रै विपिनको एक भिडियो सार्वजनिक भएको थियो, जुन हमासले उनलाई अपहरण गरेको केही दिनपछि रेकर्ड गरेको थियो ।
हमासले पहिलो चरणमा सात बन्धकलाई उत्तरी गाजाबाट र दोस्रो चरणमा १३ जनालाई दक्षिणी गाजाबाट मुक्त गरेको थियो। इजरेली सेनाले उनीहरू इजरेल पुगिसकेको जनाएको छ। ज्यान गुमाइसकेका बन्धकहरूको शव भने हस्तान्तरण हुन बाँकी नै छ।
दुऐ पक्षबीच भएको सहमतिअनुसार इजरेलको हिरासतमा रहेका १,७०० जना र २५० प्यालेस्टिनी कैदी मुक्त हुन लागेका छन्।