इजरेली सेनाका अनुसार हमास समूहले “बन्धक बनाएकै अवस्थामा ज्यान गुमाएका” नेपाली विद्यार्थी विपिन जोशीको शव आज दिउँसो नेपाल आउँदै छ।
काठमाण्डूस्थित त्रिभुवन अन्तर्राष्ट्रिय विमानस्थलमा दिउँसो २ बजेपछि शव आइपुग्ने अपेक्षा गरिएको परराष्ट्र मन्त्रालयका अधिकारीहरुले बताएका छन्।
काठमाण्डूबाट नेपाली सेनाको संयोजनमा विपिनको शव उनको घरसम्म पुर्याइने मन्त्रालयका प्रवक्ताले जानकारी दिए।
“दिउँसो २:३० बजे शव आइपुग्ने गरी व्यवस्थापन गरिएको छ। सम्माननीय प्रधानमन्त्री सुशीला कार्कीज्यूले विमानस्थल नै गएर विपिनप्रति श्रद्धाञ्जलि व्यक्त गर्ने कार्यक्रम रहेको,” मन्त्रालयका प्रवक्ता लोकबहादुर पौडेल बताए।
“त्यसपछि नेपाली सेनाको संयोजनमा विपिनको शवलाई उनको गृहनगर कंचनपुरमा पठाइने छ।”