तेल अविव — हमासद्वारा बन्धक बनाइएका अवस्थामा ज्यान गुमाएका नेपाली विद्यार्थी विपिन जोशीको सम्मानमा इस्रायलमा श्रद्धाञ्जलि कार्यक्रम सम्पन्न गरिएको छ।
कार्यक्रम आइतबार बेन गुरियन विमानस्थलमा आयोजित गरिएको हो। उक्त समारोहमा इस्रायल सरकारका प्रतिनिधि, तेल अविभस्थित नेपाली दूतावासका अधिकारी, इस्रायलमा कार्यरत नेपालीहरू, तथा हमासद्वारा बन्धक बनाइएका व्यक्तिहरूका परिवारका प्रतिनिधि उपस्थित थिए।
समारोहमा वक्ताहरूले “लर्न एन्ड अर्न” कार्यक्रमअन्तर्गत अध्ययनका लागि इस्रायल पुगेका विपिनप्रति गहिरो सम्मान प्रकट गर्दै, उनलाई बचाउन नसकिएकोमा दु:ख व्यक्त गरेका थिए।
समाचार संस्था रोयटर्सका अनुसार, उपस्थित इस्रायली अधिकारीहरूले विपिनप्रति श्रद्धाञ्जलि अर्पण गर्दै उनको आत्माको चिरशान्तिको कामना गरेका थिए।
सन् २०२३ को अक्टोबर ७ मा हमासको भीषण हमलाका क्रममा विपिन जोशी बन्धक बनाइएका थिए। उनी ‘लर्न एन्ड अर्न’ कार्यक्रमअन्तर्गत इस्रायल पुगेको तीन हप्तामै यो घटना भएको थियो।
पछिल्ला महिनासम्म पनि विपिन जीवितै रहेको आशा परिवारले राख्दै आएको थियो।
युद्धविराम सम्झौताअन्तर्गत हमासले इस्रायललाई हस्तान्तरण गरेको विपिनको शव सोमबार नेपाल आइपुग्ने परराष्ट्र मन्त्रालयले जनाएको छ।
नेपाल आइपुगेपछि उनलाई विशेष श्रद्धाञ्जलिसहित परिवारलाई बुझाइने तयारी भइरहेको मन्त्रालयले जनाएको छ।