ह्वाइट हाउसमा युक्रेनी राष्ट्रपति भोलोदिमिर जेलेन्स्कीले लगाएको पहिरनको चर्चा भएको छ ।


सोमबार राति (नेपाली समयअनुसार) अमेरिकी राष्ट्रपति डोनाल्ड ट्रम्पसँग वार्ताका लागि ह्वाइट हाउस पुगेका जेलेन्स्कीको पहिरनबारे सुरुमै पत्रकारले चासो व्यक्त गरेका थिए । कालो सैनिक शैलीको सुट लगाएर ह्वाइट हाउस प्रवेश गर्दै गर्दा सञ्चारकर्मीले तारिफ गरेका थिए । त्यसमा लगत्तै राष्ट्रपति ट्रम्पले पनि समर्थन जनाए ।

जेलेन्स्कीले ट्रम्पसँगको अघिल्लो भेटमा आफ्नो पहिरनको आलोचना गरेका सञ्चारकर्मी ब्रायन ग्लेनलाई जवाफ पनि फर्काए, ‘तपाईंले फेब्रुअरीमै लगाएको सुट लगाउनुभएको छ । मैले परिवर्तन गरेँ ।’

पहिरनबारे ट्रम्प, जेलेन्स्की र सञ्चारकर्मीले गरेको कुराकानीको छोटो भिडियो सामाजिक सञ्जालमा ‘भाइरल’ छ ।

अघिल्लोपटक वार्ताका लागि ह्वाइट हाउस पुग्दा जेलेन्स्कीले सुट नलगाई गएका थिए । त्यसबेला ट्रम्प र जेलेन्स्कीबीच घोचपेच भएको थियो । तर, यसपटक भने उनी औपचारिक पहिरनसहित ह्वाइट हाउस प्रवेश गरे । उनी ह्वाइट हाउस जानुअघि नै उनले कोट लगाउँछन् कि लगाउँदैनन् भनेर चर्चा सुरु भएको थियो ।

