काठमाडौं । नेकपा (एमाले)का अध्यक्ष एवं निवर्तमान प्रधानमन्त्री केपी शर्मा ओलीले आफ्नो पार्टीले मात्र मुलुकलाई सही बाटोमा फर्काउने दाबी गरेका छन् ।
जेनजी आन्दोलनपछि पहिलो पटक शनिबार भक्तपुरको गुण्डुमा आयोजित कार्यक्रममा बोल्दै ओलीले राष्ट्रलाई जोगाउन र शान्ति तथा समृद्धिको बाटोमा फर्काउन संयमताका साथ एकताबद्ध भएर अघि बढ्नुपर्ने बताए ।
उनले भने, ‘घर जले पनि, ठुलो क्षति भए पनि एमालेका कार्यकर्ताले हरेश खानु हुँदैन । एमालेले नै मुलुकलाई फेरि सही बाटोमा फर्काउने छ । त्यसकारण कार्यकर्ता र सिंगो देशवासीलाई संयम अपनाउन आग्रह गर्छु ।’
अध्यक्ष ओलीले आक्रोश, रिसराग र वैरभाव छोडेर राष्ट्रिय एकता र समझदारीका आधारमा अघि बढ्नुपर्नेमा जोड दिए । उनले सबैलाई शान्ति, स्थिरता र समृद्धिको बाटो रोज्न आह्वान गरे ।