आगामी सेप्टेम्बर २७ देखि यूएईमा हुने नेपाल-वेस्टइन्डिज टी-२० सिरिजको प्रसारण रुटिन अफ नेपाल बन्दले गर्ने भएको छ।
नेपाली क्रिकेट इतिहासमा एउटा ऐतिहासिक कोसेढुंगा मानिएको नेपाल-वेस्टइन्डिज टी-२० अन्तर्राष्ट्रिय सिरिजको स्पोन्सरशिप तथा प्रसारण अधिकार रुटिन अफ नेपाल प्राइभेट लिमिटेडले प्राप्त गरेको छ ।
बुधबार फेसबुकमा एक पोस्ट राख्दै नेपाल क्रिकेट संघ (क्यान) ले यूएईको शारजाहमा हुने यस सिरिजका लागि रुटिन अफ नेपालले विशेष अधिकार पाएको जानकारी दिएको हो ।
नेपालले वेस्टइन्डिजसँग सेप्टेम्बर २७, २८ र ३० मा तीन टी-२० अन्तर्राष्ट्रिय खेल खेल्ने तालिका रहेको छ ।
रुटिन अफ नेपालले फेसबुक, एक्स, इन्स्टाग्राम, युट्युब लगायतका सामाजिक सञ्जालमा ‘रुटिन अफ नेपाल बन्द’ को नामबाट सामग्री पोस्ट गर्दै आएको छ । यसअघि चैत २०७९ मा यस कम्पनीले आफ्नो युट्युब च्यानलमार्फत प्रधानमन्त्री कप त्रिदेशीय फुटबल प्रतियोगिताको प्रत्यक्ष प्रसारण देखाएको थियो ।
सन् २०१४ मा टी-२० विश्वकपमा छनोट भएपछि नेपालले अन्तर्राष्ट्रिय क्रिकेट काउन्सिलबाट टी-२० आई खेल्ने मान्यता पाएको थियो । तर, आईसीसीका पूर्ण सदस्य राष्ट्रसँग द्विपक्षीय सिरिज खेल्न नेपाललाई ११ वर्ष कुर्नु परेको हो ।
नेपाल वेस्टइन्डिज सिरिज यूएईको शारजाह क्रिकेट स्टेडियममा हुने छ ।