बैतडी, १६ भाद्र २०८२ / बैतडीको डिलाशैनी गाउँपालिकास्थित ५ नम्बर वडा कार्यालयको नवनिर्मित प्रशासकीय भवन सोमबार औपचारिक रूपमा उद्घाटन गरिएको छ। अब वडा कार्यालयले आफ्नै भवनबाट स्थानीय सेवा प्रवाह गर्न सुरु गर्नेछ।
गाउँपालिकाका प्रवक्ता एवं वडा नम्बर ५ का अध्यक्ष यज्ञराज भट्टले बताए अनुसार, यसअघि वडा कार्यालय भाडाको भवनबाट सेवा प्रवाह हुँदै आएको थियो। नयाँ भवनले सेवा सुविधा अझ सहज बनाउनेछ।
उद्घाटन समारोहमा प्रमुख अतिथि नेपाल सरकारका उद्योग, वाणिज्य तथा आपूर्ति मन्त्री दामोदर भण्डारी उपस्थित थिए। मन्त्री भण्डारीले डिलाशैनी गाउँपालिकाको समग्र विकासका लागि तीनै तहको सरकार मिलेर सहकार्य गर्न तयार रहेको प्रतिबद्धता व्यक्त गरे।
मन्त्री भण्डारीले एकल बहुमतको सरकार भएमा मात्रै जनताका काम गर्न सहज हुने बताएका छन्।
मन्त्री भण्डारीले भने बहुमतको सरकार नहुँदा काम गर्न समस्या भएको बताए। मन्त्री भण्डारीले भने, ‘जनआकाङ्क्षा धेरै छन्। चुनावमा गरेका प्रतिबद्धता पूरा गर्न सकिएको छैन। एकल बहुमतको सरकार नहुँदा समस्या भएको हो। अपेक्षाकृत विकास हुन् एकल सरकार आवश्यक छ।’
समारोहमा सुदूरपश्चिम प्रदेश सरकारका भौतिक पूर्वाधार विकास मन्त्री सुरेन्द्र बहादुर पाल र गाउँपालिका अध्यक्ष सन्तोषप्रकाश जोशी पनि विशिष्ट अतिथि थिए। अध्यक्ष जोशीले आगामी दुई वर्षभित्र गाउँपालिकाको आफ्नै प्रशासकीय भवन निर्माण सम्पन्न गरिने तयारी भइरहेको जानकारी दिए।
पालिकाको भवन निर्माणका लागि राष्ट्रिय योजना आयोगबाट झण्डै ७ करोड रुपैयाँ र गाउँपालिकाबाट रु १ करोड २२ लाख बजेट सुनिश्चित गरिएको छ।
अध्यक्ष जोशीले डिलाशैनी गाउँपालिकाको भौतिक, सामाजिक र प्रशासनिक विकासका लागि विभिन्न योजनाहरू अघि बढिरहेको जानकारी दिए। उनले थपे कि गोकुलेश्वरदेखि गाउँपालिका सदरमुकामसम्मको १८ किलोमिटर सडक कालोपत्रे कार्य पनि प्रक्रियामा रहेको बताए।
कार्यक्रमको समापन समारोहमा वडाध्यक्ष यज्ञराज भट्टले भने कि वडा विकासमा आफ्नो मन, वचन र कर्मले प्रतिबद्धता कायम रहेको छ। उनले वडा कार्यालय भवन निर्माणमा सहयोग पुर्याउने गाउँपालिका सदस्य, जग्गादाता, निर्माण व्यवसायी र सरोकारवालाहरूलाई धन्यवाद व्यक्त गरे।