कैलाली, असोज ७। कैलालीको जानकी गाउँपालिका–५ पथरैया नजिकै रहेको रानी जमरा कुलरिया सिँचाइ आयोजनाको कुलरिया नहरमा नुहाउने क्रममा तीन बालिकाको मृत्यु भएको छ।
मृत्यु हुनेमा टीकापुर नगरपालिका–१ का जुम्ल्याहा दिदीबहिनी निशा बजगाईं र मानुषी बजगाईं, तथा जानकी गाउँपालिका–५, गुजरुवाकी सुलोचना तिमिल्सैना रहेका छन्।
तीनै जना विद्यालयबाट घर बिदा भएर नुहाउन नहरतिर गएका थिए। नहरको पानी बढेको कारण नुहाउने क्रममा गहिरो भागमा डुबेर उनीहरूको ज्यान गएको इलाका प्रहरी कार्यालय टीकापुरका प्रमुख प्रहरी नायब उपरीक्षक प्रकाश डाँगीले जानकारी दिए।
निशा र मानुषी जनजागृति माध्यमिक विद्यालय, सीतापुरमा कक्षा ५ मा अध्ययनरत थिए भने सुलोचना सरस्वती माध्यमिक विद्यालय, दुर्गौलीमा कक्षा ४ मा अध्ययनरत थिइन्।
मृतकहरूको शव पोष्टमार्टमका लागि टीकापुर अस्पतालमा राखिएको छ।
घटनाबारे थप अनुसन्धान भइरहेको प्रहरीले जनाएको छ।